عن الفن

لو قلت لك تغمضي عينك وتتخيلي ست جميلة، هتشوفي ايه؟ غالبًا ملامح أوروبية، لبس غربي، ألوان فاتحة، شنطة ماركة، وإكسسوارات غالية، صح؟ بس عمرك سألتي نفسك ليه دي صورة “الجمال” اللي في دماغنا؟

الحقيقة إن معايير الجمال مش حاجة طبيعية، دي حاجة مرتبطة بالنظام الطبقي. دايمًا الجمال بيتحدد على حسب الطبقة اللي المفروض تكون “الأرقى”. هنلاقي كان في عصر الست الجميلة في هي الست ”المليانة“ لأن ده مؤشر واضح إنها تقدر تاكل لحد التخمة في وقت كان ناس كتير بتموت من الجوع، وعصر تاني الست لازم تكون ”سفيفة“ و“ضعيفة“ كأن حبة هوا ممكن يوقعوها من مكانها، عشان ده معناه إنها مش هتقدر تشتغل ومش محتاجة تشتغل، وحاليًا الست الجميلة اللي جسمها ”رياضي“ ممكن تقضي ساعتين كل يوم في الجيم وتاكل صدور فراخ مشوية وخضار سوتيه.

معيار تاني محتاج مراجعة هو صغر السن، واللي ناس كتير بتحاول تبرره بيولوجيًا، لكن لما تيجي تقارني، هتلاقي الرجالة مفيش عليهم نفس الضغط. الراجل الكبير “وسيم وجذاب”، لكن الست لازم تبان أصغر، لأن المجتمع بيربط الشابة الصغيرة في السن بالبراءة، وأحيانًا بالسذاجة، وده بيتهم على إنها أسهل في التلاعب بيها والسيطرة عليها.

أنا مش بقولك ترفضي معايير الجمال، لكن قبل ما تجري وراها، فكري: المعيار اللي بتحاولي توصلي له… بيدعم مين؟ وليه؟