كبرت مع الفن القبطي محاوطني في البيت والكنيسة، وبدون ما اخد بالي ابتدا يزرع فيا افكار محددة عن علاقة الروح بالجسد، افكار زي أن في صراع مستمر ما بين الاتنين، ولأن الروح اسمى فاللي ينجح في انكار -وأحيانًا حتى حرمان- رغبات الجسد هو ده اللي يستحق بالاحتفاء والمديح، زي القديسين والشهداء اللي ايقوناتهم في كل مكان حواليا.
ازاي اسلوب الفن القبطي بيعمل كده؟
أولًا: الأجساد متشابهة جدًا، الرجالة كلهم شبه بعض والستات كمان، عشان الجسد مش مهم وكلنا متساويين قدام ربنا.
ثانيًا: الوش بيكون اكبر شوية من الطبيعي، والملامح تكاد تكون واحدة، العينين واسعة جدًا لأنها رمز للحكمة اللي الإيمان بيضفيها على روح المؤمن، وإنه شايف ومركز على الحقيقة الأهم في الحياة وهي الحياة بعد الموت. الفم مقفول عشان الأفعال أقوى بكتير من الكلمات، كمان تسليم وسلام في قدر ربنا.
ثالثًا: القديسين والشهدا مميزين عن طريق الهالة اللي بتحيط راسهم، وكأنهم بتضحيتهم بجسدهم في العالم ده بيكسبوا مكانة نبيلة في العالم الآخر. استخدام اللون الدهبي في الخلفية بيأكد الفكرة، أن التضحية بثروات الدنيا بيضمن لك ثراء روحي في الآخرة.
التناقض الشاسع
لما باكبر شوية بالاحظ أن قدام الفن القبطي في نوع تاني من الفن مختلفة تمامًا، الفن الغربي عامة والفن التشكيلي تحديدًا بيعرض افكار زي:
- كل اللي نقدر نثبت وجوده بالحواس هو الجسد، وبالتالي الجسد أهم.
- الإنسان جزء من الطبيعة والطبيعة جميلة وبالتالي الجسد البشري جميل.
- الفنان جزء من النظام الاقتصادي والاجتماعي القائم مش فوقهم، وبالتالي لازم يروج للأفكار الشائعة في وقته أو يحاول بذكاء يروج لأفكار متناقضة لكن في النهاية لازم يلاقي مشتري لفنه أو هيتقطع عيشه.
عشان كده بنشوف في الأول لوحات موضوعها ديني مصممة تتباع للكنايس وأبناء الطبقة العليا اللي عايزين يظهروا تدينهم، لكن اللوحات دي بتركز اكتر واكتر على الشكل الخارجي وتنسى الروح، بنشوف لوحات للعذراء مريم لكن كمثال لمعايير الجمال الأنثوي الاوروبي، أو نتحرك ابعد ونشوف مشهد من قصة سوسنة، تحديدًا مشهد تلصص الاتنين الشيوخ عليها وهي بتستحمى، وتجاهل أو ادعاء الجهل إن ده مش المشهد الرئيسي في القصة وإن كان بصريًا الأكثر إثارة، وإن في المعتاد الطريقة اللي بنشوف فيها المشهد مش بتخلينا متضامنين مع سوسنة بالعكس بنشارك الشيوخ الفاسدين في التلصص عليها.
مع الوقت يبعد الفن الغربي اكتر كمان لدرجة إنه يعرض لوحات ضد الدين عامةً والدين المسيحي تحديدًا، أو يبعد تمامًا عن افكار الروح بتصوير مناظر طبيعية أو تمجيد للفلاحين والعمال أو الطبقة الحاكمة أو تمجيد الحرب أو معارضتها.
ايه الاحسن؟
ما بين فن بيمجد الروح وفن بيقدر الجسد الاختيار في حياتنا المعاصرة فعلًا واقف على المشتري، أنت اللي بتحدد ايه هو الفن المناسب لقيمك ومعتقداتك وفلسفتك في الحياة، عشان كده مهم إنك تكون واعي لإن أى لوحة أو تمثال مش بس بيمثل لحظة أو مشهد في قصة مسلية أو مفيدة، ممكن كمان يكون بيزرع ألف فكرة وفكرة في ذهنك، مع الوقت الفن اللي بتحيط نفسك بيه هيبقى جزء منك، فنصيحتي: اختار بوعى… اختار بحكمة!
اترك رد