بالرغم من حبي للفن ومحاولاتي المستمرة لفهمه بشكل أعمق، سواء عن طريق قراية الكتب، زيارة المتاحف أو حتى متابعة المحتوى الفني على يوتيوب وتيك توك، إلا إن جزء مني بيستغرب -ويمكن كمان بيتردد- لما باشوف لوحة أو تمثال لجسد عاري، وده شيء متوقع بالنظر للخلفية الثقافية والدينية اللي جاية منها، لكن بيفضل السؤال: ليه العرى جزء من الفن؟
الثقافات المختلفة
معظم الأعمال الفنية اللي بتعرض العري بتكون اصولها غربية أو مصرية قديمة اللي بسبب بعد الزمن أو المكان بيسمح لوجود ثقافة مختلفة، وده بيضفي معنى تاني للجسد البشري زي مثلًا:
في مصر القديمة
العري كان رمزي اكتر منه حسي. في حالة الفراعنة والآلهة القديمة، بيكون رمز للقوة والشباب، وفي حالة الإلهات زي حتحور، بيكون رمز للرعاية والأمومة.
عند الأغريق
كان العري جزء من الاحتفاء بالجسد البشري اللي بيسمح للأبطال بتحقيق مهماتهم المستحيلة، وبالتالي كان بيبقى استعراض لقدراتهم الرياضية أو الحربية.
في عصر النهضة الأوروبي
كان في محاولة للفنانين الأوروبين استعادة مجد الماضي اللي كان أيام الأغريق والرومان عن طريق محاكاة وتطوير الفن بتاعهم، عشان كده بنلاقي لوحات بتمثل مشاهد من الأساطير أو القصص الدينية، بتظهر الجسد البشري بإعتباره جزء من جمال الطبيعة والمخلوقات.
العري والإثارة
ده ما بينفيش إن مع الوقت ابتدا يبقى في جانب حسي للعري في الفن واستغلاله تجاريًا، وزي ما الامريكان بيقولوا ”sex sells“ أو ”الجاذبية الجنسية بتبيع“ وبالتالي وجود راجل أو ست جميلة بيزود من فرص مبيعات اللوحة أو التمثال، وده كان واضح خصوصًا مع الطبقة الارستقراطية اللي كانت بتدور على المتع البصرية، بما في ذلك تماثيل ولوحات لعشيقاتهم أو تمثيل لجمال اسطوري أو مميز ما حدش شافه أو اقتناه قبل كده، لأن ده مش بس بيشبع رغبتهم في دفع الملل واختبار شيء جديد، كمان بيسمح لهم باستعراض ثراءهم وسلطتهم.
العري في الفن الحديث
دلوقتي بقى في فنانين بيستخدموا العرى في أعمالهم لأسباب مختلفة:
- السعي للواقعية.
- محاكاة للأساليب الكلاسيكية.
- تحدي للتقاليد أو جذب للإنتباه والجدل اللي ممكن يحقق لهم رواج وشهرة أكبر.
في النهاية
كل واحد بيختار الفن المناسب لقيمه ومعتقداته، ممكن ترفض تمامًا العري في الفن عشان ده متعارض مع معتقداتك، ممكن تقبل بعضه وترفض بعضه لأنه متعارض مع قيمك، أو ممكن ترحب بيه كجزء من التعبير الفني وتقدير الجمال، المهم إنك تكون بتختار بوعي وبتختار بحكمة.
اترك رد